من أخطر ما قيل عن الفيس بوك .. خطيررررر فعلاً

من أخطر ما قيل عن الفيس بوك .. خطيررررر فعلاً

نقوووول تاني لعل في الإعادة إفادة ، مع إن واضح كدا ان مفيش فايدة !

" افـتــكـاســات فـيـســبــوكـيــة "

منذ دخولي عالم الفيسبوك منذ 8 أشهر وانا أرى عجب العجاب من هؤلاء الفيسبوكيون ... وإليكم بعض الإفــتـكـاسـات :

** قال ايه....!!!!
بيقولك المفروض مادمت بقيت مشهور ومعروف في الفيسبوك مينفعش تعمل لايك لحد او تشير من صفحته لأنك كدا بتقلل من مكانتك الفيسبوكية ودا مش لتشيف عشانك ...!!!

** قال ايه....!!!
كل شوية الاقي واحد فرحان قوووي بان عدد الاصدقاء عنده بقى 5000 والمتابعين مش عارفه كام الف وكل شويه تلاقيه ياعيني عمال يذل انفاس اللي العدد عندهم قليل وكأنه وصل القمر ولا غزا الفضاء .. والغريب انه كدا بيفتكر نفسه بقى حاجه مهمة في المجتمع وقيمة لايمكن الاستغناء عنها .. وممكن والله اعلم يكون مش لاقي شغل وقاعد في البيت !!!!

** قال ايه ...!!!
كل شويه الاقي واحد عمال يكتب ازاي اخت تعمل لايك لأخ ولا أخ يعمل لايك لمنشور أخت ؟؟ سبحان الله يا أخي مش يمكن البوست يستحق الإعجاب فعلا !! ولا انت مبتفصلش بين الكلام وصاحبه !!! كمان ممكن تكون الاخت بتعمل لايك لعمها او خالها او أستاذها أو احد اقاربها او جار في مقام والدها او حتى لأي حد من باب التشجيع او المجاملة ..!!!

** قال ايه ....!!!!
تلاقي واحد يبعت لواحدة رسالة على الخاص يقولها سلام عليكم وبعدين يزعل قوووي انها مردتش ويــكأن المفروض انها ترد على واحد متعرفوش !!

** قال ايه ...!!!!!
تلاقي واحدة كاتبة على صفحتها انا تعبانة ، انا عندي صداع ،انا داخله انام !! مش فاهمة ايه يعني لازمة الكلمتين دووول !!!
ماتخديلك قرص مسكن وتدخلي تتخمدي على طول ولا لازم تكتبيلك بوست الأول !!!! واللي يفقع المرارة تلاقي تعليقات الرجال شغاله على آخرها ..!!! ايشي الف سلامة .. وانشاالله العدوين .. نوم العافية ..
ولسه يا ما هنشوف في الفيسفوووووك ..!!!

** قال ايه !!!
واحد يبعتلي على الخاص يقولي هو حضرتك تخصص ايه ؟؟
وواحد تاني يقولي لو سمحتي يادكتورة انا تعبان وعندي "مش عارفه ايه" ممكن توصفيلي علاج !!!
وواحد يبعتلي على الخاص يقولي الدكتور قالي عندك كذا ممكن تشرحيلي معناها علشان انا اتخضيت !!!! طب ردوا انتو بقى ...
والغريب اني لما مش برد ببقى كدا دكتورة معنديش قلب ومش بساعد المرضى والمحتشاجين !!!! الصبر من عندك يااااارب ...

** قال ايه .....!!!
واحد يبعت يقولي انا عندي عشرين سنة ويشرفني تعتبريني زي ابنك ...!!!
طب انا ابني الوحيد ربنا يحفظه ويبارك لي فيه لسه مكملش 3 سنين ونصف .. اعتبرك زيه ازااااي ؟؟ ماهو يا إما ابني كبر مني فجأة .. يا إما انت ناوي تتسخط عيل وترجع الحضانة !!!!

** قال ايه.... !!!!
واحد معرفوش يبعتلي يقولي هو حضرتك زوجة شهيد ؟؟
مش فاهمة دا هيفيدك في ايه يعني ...!!!
هو حضرتك ناوي تصاحبه في الآخرة ولا ايه !!!

** قال ايه ... !!!!
ألاقي ناس معرفهاش ضايفاني في مجموعات معرفهاش مع ناس معرفهاش كل ده وبدون إذني ..مين اداهم الحق في كده .. معرفش !!!!

قال إيه ... !!!!
واحد كل شويه يكتب بوست يطعن فيه في اي اخت حاطه صورتها .. انا فعلا مع البعض في موضوع الصورة دا .. خصوصا اذا كانت عمال على بطال تنشر صورها مرة في مسيرة ومرة في خان الخليلي ومرة مش عارفه فين وعامله صفحتها معرض صور .. طبعا عندك كل الحق ...

لكن اسمحلي لما تضايقك صورتي وانا بنقابي وعلى المنصة حيث اتشرف كل الشرف واعتبرها وسام على صدري وانا اصدح بكلمة الحق ولا اخاف في الله لومة لائم خاصة انها بعض مجزرة الفض ..
كما ان هذه الصورة نشرتها جريدة ام الدنيا والكل رآها ولست انا من نشرها

ثم ان كنت تظن ايها المتعجب والمستغرب قوووي ان ذلك غريب فأنت اذن لاتعرف ان الآلاف يعرفوني ويسمعوني كل يوم في محاضراتي ومؤتمراتي ولقاءاتي سواء في الجامعة او الندوات الثقافية او المؤتمرات الادبية لذلك لاتمثل الصورة بالنسبة لي اي إشكالية او غرابة في وضعها على صفحتي .

‫#‏بــس_وشــكـــرا‬

‫#‏د_نــاهـــد_الـديـــب‬